【Emily】今年聖誕唔出賀相 葉劉「冬日小鎮」打卡

【明報專訊】每逢節日都派「福利圖」嘅新民黨主席葉劉淑儀，早排接受訪問時話社會創傷未癒，所以今年唔出聖誕賀圖。不過噚日平安夜，葉太喺facebook話，見唔少市民出外共度佳節，多區亦擺放聖誕裝置，增添節日氣氛，佢都去咗中環皇后像廣場「冬日小鎮」，同巨型聖誕樹、飛機裝飾「打卡」。葉太更跟上潮流用迷你柯達相機自拍，比較受年輕人歡迎嘅佢都有同後生仔女合照。

唔同議員分別送上節日祝福，民建聯陳學鋒「加工」自己傳單嘅大頭相，貼上兩堂白眉、白鬚，又「戴」聖誕帽，扮聖誕老人。黨友陳恒鑌就直接用AI生成做聖誕老人，坐喺茶記歎蛋撻、菠蘿包、凍奶茶，邀請旅客嚟香港歎港式美食，又祝香港新一年更順暢、政通人和，家家戶戶安居樂業，共享繁榮同溫暖。