【Emily】黃汝榮任演藝校董會主席 霍啟剛再掌藝發局

【明報專訊】聖誕節前夕，政府噚日公布8個委員會嘅新委員，其中香港演藝學院校董會主席，由現任副主席、退休法官黃汝榮（圖）接任，校董會成員、警務處前副處長任達榮做副主席，其中任達榮係藝人任達華嘅哥哥。至於藝發局主席繼續由霍啟剛擔任，候任立法會新界東南議員葉傲冬獲委任做副主席，接替楊偉誠。各人任期同於出年1月1日生效。

文體旅局長羅淑佩話，黃汝榮熟悉演藝學院運作，有豐富公共服務經驗，期待同佢緊密合作，並期望喺校董會領導下，學院更創輝煌。

現有29個成員嘅旅遊業監管局就「大換血」，現任成員、私募基金管理合伙人林詩棋將喺1月1日起，接替本身係律師嘅馬豪輝做主席，政府同時委任15個新成員，再度委任12個現有成員。文體旅局發言人期望主席及各成員能夠繼續協助旅監局貫徹監管與服務職能。

立選落選 顏汶羽做消委會委員

獲委任公職嘅人之中不乏喺立法會選舉敗選嘅候選人，其中未能喺九龍東連任嘅民建聯顏汶羽獲委任做消委會委員。同屬民建聯、未能晉身立法會嘅葵青區議員盧婉婷，則獲委任為酒牌局成員。