【Emily】馬會姚基金合作推廣籃球發展

【明報專訊】立法會之前通過籃球博彩合法化，馬會亦出錢出力推廣籃球。馬會噚日公布本月初已同北京姚基金公益基金會簽署合作備忘錄，探索合作項目同交流活動，加強推廣籃球同青年體育發展。姚基金理事長姚明更去到馬會沙田會所簽備忘錄，佢話姚基金本住「以體育人」理念，致力促進青少年健康發展，而馬會長期聚焦青年體育發展，雙方目標一致。

馬會承諾未來3年撥款30億元推動體育發展。喺籃球方面，馬會慈善信託基金今年捐咗逾7000萬元推動「賽馬會越戰越強籃球計劃」，畀更多學生同弱勢社群體驗籃球樂趣；又支持警務處「少年警訊禁毒防罪3×3籃球培訓計劃」，促進青少年參與呢項運動，其他項目包括捐助提升灣仔修頓球場嘅籃球場地等設施，以舉辦更大型、國際化賽事。