【Emily】上周六迎23.5萬客 非內地客今年新高

【明報專訊】星期四係聖誕節，香港嘅節日氣氛幾濃厚，一向受到遊客追捧，會趁假期嚟感受一下。文體旅局噚日就公布咗上周六（20號）嘅訪港旅客數字，有超過23.5萬人次，當中內地旅客超過18.7萬人次，係今年國慶黃金周以嚟最高紀錄；非內地旅客約有4.8萬人次，係今年新高，亦係新冠疫情以來第二高。

文體旅局喺facebook發文，亦提到啟德郵輪碼頭喺上星期五（19號）迎來兩艘國際郵輪同日停泊，包括「海洋光譜號」及「歌詩達賽琳娜」號，進一步帶動郵輪旅客來港。

局方話，有關旅客數字反映無論係探親訪友抑或係節日旅遊，香港都係旅客首選目的地之一，形容唔少市民同旅客選擇喺香港共度溫馨時光，感受城市嘅獨特魅力。