【Emily】援宏福災民 在港韓國人籌得91萬

【明報專訊】大埔宏福苑火災牽動人心，各方伸出援手，其中在港韓國人社群透過多個渠道籌得約91萬元，另喺火災發生初期，有韓國企業同食肆捐出電器同食物等。

分別代表約2萬在港韓國人同大小韓國企業嘅香港韓人會及韓人商工會，分別為火災籌得約55萬及20萬元，計埋韓國國際學校籌得嘅15.2萬元，一共約91萬元。學校同韓人會分別將善款捐去紅十字會同政府專項基金。

有人捐血有人送泡菜

韓人會會長卓衍均話，在港韓國人見到火災好傷感，大家都想幫手，除咗捐款，都有韓國人去捐血。佢話「當鄰居有危難或需要，韓國嘅傳統係要伸出援手，而港人係我哋鄰居，就需要幫手」。

韓人商工會主席金準會話，唔少韓國企業都希望幫到災民，所以發起籌款，「我們喺香港做生意，大家都愛香港，希望遇上困難都幫助大家」。根據該會數字，三星、曉星等韓國企業都有參與，籌款到呢個禮拜五截止。金主席又話喺火災初期，LG都有送洗衣機同雪櫃等，另外有餐廳同公司等捐出辛拉麵同泡菜。

韓國駐港總領事館噚日國慶日酒會都有舉行默哀儀式悼念火災遇難者，代總領事千成煥向遇難者及家人致以深切哀悼，祝願傷者早日康復。