【明報專訊】第59屆工展會日前已開幕，但噚日先搞「啟動典禮」，政務司長陳國基、中聯辦副主任劉光源等人出席。嘉賓到場就梗係乘機逛一逛購物，陳國基就買咗廚具、鮑魚、花膠雞湯湯包及「創業展才能計劃」朋友製作嘅掛飾，湊夠3808元好意頭。佢話今次工展會特別設立「樂齡活力區」，集中展示各類保健產品及長者用品，樂見唔少參展商主動為「老友記」提供額外折扣，展現社區共融嘅溫暖。
主辦方廠商會會長盧金榮就話，工展會嘅真正價值從來唔止經濟功能，更係活動承載嘅香港精神，又話喺當前社會努力走出悲傷、經濟要提質提速發展嘅時刻，工展會肩負起為市民帶來慰藉、推動內需、扶助中小企及展示香港活力嘅多重使命。
