【Emily】仙八色鶇捉走治理 嘉道理農場：曾骨折不宜野放

【明報專訊】日前一隻懷疑受傷嘅「易危」過境雀鳥仙八色鶇（鶇粵音東）被發現於荔枝角公園出沒，吸引大批觀鳥者去拍攝，漁護署噚日派員到場以籠成功捕捉，送到嘉道理農場暨植物園進一步檢查治理。

嘉道理農場暨植物園話，呢隻仙八色鶇被送到園內嘅野生動物拯救中心，檢查發現佢尚算健康，但右翼有一處明顯骨折；之後園方為佢照X光，確認右翼尖有兩處骨折，估計於3至4星期前發生，雖已癒合，但已錯過黃金治療期，因此無法做骨折修復。雖然佢仍有一定飛行能力，但相信無法負荷長途飛行，並大大降低喺遷徙路途中嘅存活率，亦好容易成為各種掠食者嘅獵物，因此園方認為野放佢並唔可行，甚為可惜。

話適合圈養作教育展覽用

園方又話，撇除飛行能力，呢隻仙八色鶇好健康，而且對人戒心較低，相信會係一隻適合留喺圈養環境作教育展覽用途嘅動物。園方拯救團隊會為佢搵本地合適嘅圈養方案，再有進一步行動前，呢隻仙八色鶇會安置喺拯救中心照料。

漁護署日前先後兩次派員到場，但無捕捉該鳥。該署噚日再派員捕捉，發言人解釋，同動物福利機構商討並由漁護署獸醫師詳細評估後，認為雀鳥傷勢可能影響飛行能力，因此安排噚日朝早派員到場拯救。