【Emily】煤氣「氫能櫃」供電全運高球賽

【明報專訊】煤氣公司有贊助今屆全運會，佢哋為高爾夫球賽事提供電能方案，用一體化氫能發電機為場地提供電力，發電機日前已經設置喺粉嶺高爾夫球場嘅全運會高球賽事現場。

呢套機組只得一個貨櫃咁大，內置發電系統、氫氣儲存瓶，應用由煤氣公司生產嘅氫氣產生電力，配合電池儲能系統，為場內嘅警察指揮總部、志願者總部等供應臨時電力。

煤氣公司安排多個學術團體參觀氫能發電系統，機電工程署長潘國英亦帶領團隊去到現場，了解機組運作同安全設施，佢同煤氣公司營運總裁—香港業務鄭曉光交流本港氫能發展。鄭曉光話，透過用本地製造嘅低碳氫，賽事嘅碳排放將顯著減少，展現本港氫能應用同可持續發展領域嘅創新實力。氫能發電機產電過程只會產生水蒸氣，唔會排放二氧化碳。