【Emily】St. Jo仔李國寶夏佳理賀校慶 李家超拍片讀拉丁文校訓

【明報專訊】港島名校聖若瑟書院前晚舉行150周年校慶晚宴，幾代「St. Jo仔」雲集，包括東亞銀行主席李國寶、中大校長盧煜明、行會成員林健鋒、高院前法官包華禮、大律師公會前主席石永泰、資深大律師余若海、新世界發展非執董杜惠愷、前立法局議員何承天等。

校友梁釗峰許廷鏗獻唱

久未公開露面嘅校友、前行政立法兩會議員夏佳理喺校慶短片話，聖若瑟係人生求學最開心嘅幾年。李國寶話，曾祖父係家族中第一個入聖若瑟書院嘅學生，形容學校有如流在血液中。石永泰就話，St. Jo代表自由同創意。

石永泰：母校代表自由同創意

晚宴先奏國歌，之後祈禱同唱校歌。St. Jo另一特點係明星搖籃，校友梁釗峰同許廷鏗都上台唱歌表演。林健鋒晚宴後喺facebook都話，求學時期對知識執著同同窗情誼，至今仍係人生最寶貴基石，並感謝母校培養。

九龍華仁書院畢業、唔係校友嘅特首李家超都有拍片，用英文致辭，肯定聖若瑟書院校友橫跨科學、商界同文化藝術，並讀出聖若瑟書院拉丁文校訓。呢期政府催票，李家超都有乘機呼籲在場合資格者喺12月7號立法會選舉投票。