【Emily】廚尊未搵到合適伙伴續營 許承俊：不捨員工 唔會放棄

【明報專訊】旺角社企餐廳「廚尊」創辦人許承俊（圖）因為身體問題，今年6月拍片上載社交平台，希望搵到有心人合作繼續經營，其後佢收到超過30個單位查詢。但噚日佢同Emily講，仲未搵到合適合作伙伴，不過佢無打算放棄，相信一定會喺香港搵到個有心有力嘅人合作。

許承俊話，要搵到合適合作伙伴一啲都唔易，部分單位雖然有心，但係就未能夠投資200萬元落廚尊到，都有啲單位缺乏同殘疾人合作嘅經驗，仲有啲只係睇中廚尊個舖位，無意同店內殘疾員工合作，「咁我唔放心，佢哋（員工）好似我仔女咁」。

廚尊2019年由新加坡引入香港，培訓同聘用唔少殘疾人，目前店內78個員工，有60幾人都係殘疾人。許承俊話知道近年經濟環境唔好，餐飲業都困難，要繼續經營廚尊唔容易，醫生近嚟亦勸佢唔好再操勞，但佢始終唔捨得班員工，唔想放棄廚尊做緊嘅工作，目前無諗捱到幾時結束，會繼續物色合適合作伙伴，「我唔相信喺香港搵唔到有心有力嘅香港人」。