【Emily】馬逢國唔使忙選舉 又去歡送南極考察隊

【明報專訊】立法會選舉開跑，參選人都忙於開街站做競選工作，而早已表明唔再選嘅選委界立法會議員馬逢國，日前反而有時間去上海，出席中國第42次南極考察隊出發嘅歡送儀式。馬逢國喺社交媒體話，今次係佢連續第三年出席考察隊歡迎儀式，話考察隊每次出發都配備唔同嘅新裝備去應付艱巨任務。

馬逢國話，見到國家喺極地科研發展進步，覺得好自豪，期待考察隊出年5月完成任務歸航。佢又話喺儀式前，有幸同國家自然資源部副部長孫書賢簡單交流，盼望香港喺國家極地事業發展發揮更積極的角色。

今次隊員包括6個喺香港選拔嘅科學家，係首次有香港科學家獲選加入國家南極考察隊，參與極地科研考察。睇番內地媒體資料，南極考察隊11月1號喺上海起航，今次再出動「雪龍」號及「雪龍2」號，去南極內陸冰層深處嘅湖泊做科學鑽探試驗，利用國產熱水鑽和熱融鑽系統，喺超過3000米嘅冰層做潔淨鑽進與取樣作業，探索與世隔絕嘅冰下湖環境與地質特徵。