【Emily】新晉大狀搞國際會議 探討藝術法律加密幣

【明報專訊】大律師公會轄下新晉大律師常委會今年第三年搞國際會議，探討藝術法律同加密貨幣規管。

常委會主席鄧天麟（Felix）喺會上話，今次有別過去探討大律師上庭，邀請到藝術同金融專家參與，鼓勵新晉大律師以更宏觀角度理解法律喺唔同範疇嘅角色同最新趨勢。講者包括專程來港嘅阿姆斯特丹市立博物館首席管治總監Martha Visser，同本身都係「law友」嘅香港M+博物館藏品管理專員謝嶺雲等，仲有歐洲、新加坡、馬來西亞等海外律師協會代表來港參加。

主禮嘅律政司長林定國話，藝術法同加密貨幣快速發展，為年輕律師帶來機會，同時都面對一大挑戰，就係點樣保護知識產權，尤其人工智能（AI）製作藝術作品，可能要探討改善《版權條例》喇。