【Emily】遊客中心翻新重開 增互動展區 城門郊園新設水浸白千層影像廊

【明報專訊】城門郊野公園遊客中心已完成翻新工程，今日起重新開放。遊客中心因應近年遊客鍾意「打卡」，增設咗多個互動展區兼影相位，包括城門水塘著名景點「水浸白千層」，就變咗做影像走廊，營造「沉浸式」效果。遊客中心仲會有新服務，包括借出外置充電器、地圖及行山杖。

有得借充電器地圖行山杖

遊客中心會展示城門郊野公園嘅自然景觀等資料，以不同展品同展板介紹公園嘅歷史變遷、附近嘅遠足路線、唔同季節嘅景色，同埋當地豐富多樣嘅生境及動植物。

另外，遊客中心仲增設咗互動展區，介紹城門嘅戰時遺迹、著名景點等，包括有介紹公園蝴蝶嘅互動遊戲區。

遊客中心亦設有免費公眾導賞服務，介紹城門郊野公園嘅生物多樣性及戰時遺迹，仲有不同學校教育活動，畀幼稚園同中小學報名，學習有關香港嘅生物多樣性及植物史等，每團15至30人，報名詳細稍後喺漁護署網站公布。