【Emily】港片取景10歷史建築 部分對外開放

【明報專訊】唔少港產片都會借用特色建築取景拍攝，當中唔少係歷史建築，發展局轄下文物保育專員辦事處今年10至11月繼續舉辦「古蹟周遊樂」活動，發展局長甯漢豪噚日發表網誌，話今年活動以「當古蹟遇上電影」為主題，介紹10個曾被用作電影場景嘅法定古蹟及歷史建築（見表），當中包括以往有特別用途而未能恒常開放嘅歷史建築，例如仍作原有用途嘅東華義莊及香港大學大學堂，前者係電影《破．地獄》取景地，而現時係學生宿舍嘅港大大學堂就係《流氓醫生》、《玻璃之城》、《竊聽風雲2》等多套電影嘅取景地。

活動涵蓋嘅另一法定古蹟係聖士提反書院，該校歷史推廣及文物保育統籌老師陳國培話，書院歷史悠長，擁有唔同時期嘅建築群，而學校發展歷史亦連結香港歷史不同時期嘅重要事件，例如日佔時期歷史，因此希望透過活動讓公眾認識該校以至香港歷史。

辦130免費導賞團

發展局工程師（文物保育）陳嘉禮表示，今年「古蹟周遊樂」推出逾130個免費公眾導賞團供大眾參加，另有巡迴展覽喺全港多個地點舉行，展出至12月底，詳情可透過文物保育專員辦事處活動專頁了解詳情。