【Emily】《三體》作家膺科大榮譽博士 葉玉如請劉慈欣食大牌檔

【明報專訊】科技大學上周迎來著名科幻小說《三體》作家劉慈欣，同師生分享對未來嘅想像。劉慈欣係首個亞洲人獲得有「科幻界諾貝爾獎」之稱嘅雨果獎，佢上周到科大接受人文學榮譽博士，同日跟師生談天說地。佢認為可以進一步思考AI（人工智能）嘅潛力，話人類無論智力定體力都有極限，但AI就有可能穿透極限，「將我們人類的文明播送到宇宙，實現我們長久以來難以企及的夢想」。

劉慈欣又話，人類文明正處於持續上升嘅進程，技術發展最終目的應該係解放人類，唔係束縛個人成長，相信唯有科技文明進步，物質豐富先會大幅提升，人類就有機會更好發展。

黃仁勳到訪 科大亦喺深水埗愛文生設宴

科大上周六（18日）為劉慈欣洗塵，由校董會主席沈向洋及校長葉玉如帶劉慈欣去深水埗著名大牌檔「愛文生」一嘗鑊氣小菜。去年11月Nvidia行政總裁黃仁勳到訪，科大亦喺愛文生設宴款待。

《三體》係講述人類文明同外星文明之間嘅角力，科學理論與人性哲思並重，作品至今翻譯成35種語言，全球總銷量逾3000萬冊，故事仲拍成Netflix電視劇。