【Emily】黃傑龍「不尋求連任」優質旅協主席

【明報專訊】立法會準備換屆選舉，唔少資深議員宣布唔參選，亦有好多現任議員未公布未來去向。優質旅遊服務協會主席黃傑龍噚日就喺facebook宣布新動向，正值今日係立法會提名期第一日，Emily以為黃傑龍都打算參選，原來佢係宣布「不尋求連任優質旅遊服務協會主席」一職。

翻查資料，黃傑龍自2019年開始出任協會主席，至今已經6年；而佢亦解釋話因為協會會章寫明，喺同一崗位最多只能做6年，所以一到期就要轉崗位。優質旅遊服務協會喺2003年4月成立，係旅發局嘅策略伙伴，負責宣傳優質旅遊服務計劃。

噚日協會搞「翹楚匯」活動，黃傑龍趁機宣布唔連任，Emily睇番協會以前嘅新聞稿，一般新主席同副主席上任都係年初，𠵱家先10月，莫非佢都要「超前部署」？