【Emily】渣馬「少年跑」明起報名 小店今可登記「應援」

【明報專訊】渣打香港馬拉松明年1月18日舉行，今屆會喺賽事前一日（17日）增設「躍動少年跑」比賽，10至15歲青少年聽朝10點起可以喺渣馬官網報名，名額2500個，報名費200元。

目前渣馬半馬同10公里賽只限16歲或以上參加，全馬更加要年滿20歲。「躍動少年跑」係想畀青少年跑手有機會體驗渣馬，賽事全長約2公里，由啟德體育園嘅啟德青年運動場出發，途經啟德主場館同渡行徑，最後返啟德青年運動場衝線。賽事朝早9點開跑，分5組，限時30分鐘，不設名次或獎項，跑完會有獎牌同電子證書。

另外，渣馬舊年推出「助小店 撐跑手」計劃，同賽道沿途數百間食肆同小店合作，成功登記嘅店舖為跑手完成指定「打氣任務」，可以得到2000元資助。渣馬話今年會延續計劃，集中支持中小型餐飲食肆，並擴展至全港各區。有興趣店舖即日起可報名，獲選店舖要喺今年12月1日至比賽當日完成「打氣任務」，包括喺舖面貼海報、喺社交平台出post，同埋向跑手提供餐飲優惠或渣馬主題餐飲。