【Emily】話乘機解悶 田氏兄弟捧師弟黃澤林

【明報專訊】立法會議員接連公布棄選，議會一片「低氣壓」，實政圓桌田北辰前晚就同阿哥田北俊去咗睇UTS網球賽，話乘機解悶。佢話喺啟德體藝館度過咗一個愉快嘅晚上，網壇「神奇小子」黃澤林（Coleman）係田氏兄弟嘅男拔師弟，兩兄弟除咗近距離睇到師弟喺主場贏法國名將加斯基特，Coleman爸爸更主動上前同佢哋打招呼，分享個仔嘅努力同奮鬥。田北辰話兄弟難得一聚齊齊去睇波，其後一齊消夜，「後生時同阿哥周圍去嘅溫馨感覺返晒嚟」。

不過，喺連串棄選消息下，立法會秘書處前日都宣布，由於近日好多議員向大主席梁君彥反映想聚焦選舉，立法會決定取消原定今日舉行嘅特首同全體議員「惜別午宴」。有傳媒噚日喺立法會問起田北辰呢件事，佢話目前好多人宣布棄選，係歷史上少見嘅情况，好難判斷每個人係咪都歡迎聚餐，但覺得作為立法會議員，取消聚餐「對特首嚟講好似唔太好」。

民建聯主席陳克勤回應提問時就話，尊重同事想將時間放喺議會工作，覺得取消午宴係合理做法，相信唔會影響行政立法關係。