經濟
庫克訪華 直播帶貨推銷iPhone Air
【明報專訊】蘋果（美：AAPL）行政總裁庫克（Tim Cook）展開訪華行程，今次唔止走訪Apple Store門店，仲親自直播帶貨！佢星期一（13日）夜晚現身Apple Store旗艦店嘅抖音直播間，跟中國網友打招呼，因利乘便宣布中國行貨版iPhone Air將會今個禮拜五（17日）起接受預訂！
由於iPhone Air採用eSIM設計，而根據內媒報道指eSIM喺內地主要應用長期局限於智能手表、智能眼鏡、平板電腦嘅設備，所以iPhone Air之前唔能夠同iPhone 17系列喺內地同步預售。不過，庫克最新話今個禮拜五可以預訂！
庫克亦喺蘋果員工陪同下，完成佢首場面向中國消費者嘅直播帶貨，其間少不免落力推介，仲形容iPhone Air「輕得好似可以飛走」。「庫克來抖音直播了」隨即就登上內地社交平台的熱搜榜。
訪Labubu巡展 泡泡瑪特逆市升
至於直播效果點樣，大家就等睇訂單數字啦。不過，佢當日順道探訪泡泡瑪特（9992）的Labubu主題巡展，泡泡瑪特噚日股價就逆市大升，可見名人號召力相信不容忽視！
