【Emily】模擬棚屋火警 大澳跨部門救援演習

【明報專訊】天氣近日開始冇咁熱，天文台預測下周一（20號）氣溫介乎24℃至29℃，濕度50%至80%，日間乾燥。消防處噚日喺大澳舉行跨部門滅火救援演習，模擬有棚屋因為外置充電器故障而引致火警，消防出動滅火快艇、無人機同多名消防員從海陸空搜救。

今次模擬演習有大量傷者，除消防處出動，救護員同醫療輔助隊負責設立傷者分流站。演習後消防同當區防火委員會與關愛隊成員，向居民派發「防火三寶」，包括手提滅火筒、滅火氈及獨立火警偵測器，同時因應重陽節（29號）將至，消防向區內商戶同居民宣傳防止山火信息。

消防處話棚屋係大澳獨特嘅房屋類型，棚屋之間以木樁及木板搭成棧道，今次演習目的係加強各部門喺呢個獨特環境下嘅協調，以提升救援效率。