【Emily】張欣宇江玉歡獲網民撐「清泉」 聶德權盼Gary續服務香港 李華明稱Doreen極稱職

【明報專訊】被視為較「敢言」嘅立法會新界北議員張欣宇（Gary）宣布唔參選下屆立法會，選委界別議員江玉歡（Doreen）雖未有公布，但日前回應亦若有所指。二人嘅社交平台近日獲過百網民留言力撐，讚兩人係「清泉」、為民發聲，慨嘆佢哋唔再選好可惜，當中不乏政界人物。

「同學」陸頌雄讚張議政能力

同Gary一齊讀清華大學高級公共管理碩士嘅工聯會議員陸頌雄，讚對方「有獨特見解及高水平的議政能力」，睇得出佢好用心服務市民，Gary就留言多謝同學鼓勵。公務員事務局前局長聶德權就話明白同支持Gary家庭為重，希望佢以不同身分繼續服務香港，貢獻國家，Gary就畀like回應。

Doreen嘅facebook就有唔少留言話唔捨得佢，希望佢繼續參選。其中民主黨元老李華明大讚Doreen表現好過佢自己第一次做議員，點知就引發小罵戰，李留言話「我這個前議員可以有資格稱妳為一位極之稱職的立法會議員」，不過有網民唔同意，批評李華明1994年對全面普選方案投棄權，有網民就揶揄李華明話：「香港有今日，貴黨及黨友真係功不可沒！多謝你！ 」