【Emily】文武二帝出巡秋祭 百呎火龍飄色出動

【明報專訊】為慶祝創院155周年及香港特區成立28周年，東華三院噚日喺上環舉行文武二帝出巡及秋祭大典。出巡隊伍由約500人組成，展示咗多項非物質文化遺產嘅傳統技藝，包括百呎薄扶林火龍、醒獅同舞麒麟，並有扮成神明出巡嘅長洲飄色，加上傳統廟宇儀仗、旗隊等，吸引大批市民觀賞同影相。

出巡隊伍噚日朝早10點半由上環文化廣場出發，途經摩利臣街、皇后大道中及水坑口街，最終抵達荷李活道文武廟；到中午時分，廟內舉行第69屆秋祭大典。呢個祭典係其中一個香港非物質文化遺產，延續咗自1957年以來嘅傳統禮制，為香港祈福。主祭者同東華三院全體董事局成員依照傳統著上長袍玄褂行禮。

麥美娟多謝東華三院傳承習俗

去到下晝仲有好多節目，東華醫院禮堂舉辦一系列表演同體驗活動，包括中國風Hip Hop舞、變臉、民族舞同鼓舞等。現場設多個非遺文化攤位，提供糖畫、中國結、漆扇及麵粉公仔等傳統手工藝體驗。

民青局長麥美娟噚日參與活動起步禮時話，多謝東華三院竭力傳承奉祀文武二帝嘅秋祭習俗，加深公眾對民間信仰及風俗習慣嘅認識，又期望院方繼續推廣廟宇同祭祀文化，為弘揚中華文化貢獻力量。