【Emily】獲清真認證 港式餐廳：生意升5%

【明報專訊】旅發局早前推出「香港餐廳清真認證資助計劃」，餐廳喺指定期間拎到清真認證，認證費可獲半額資助。旅發局上周五舉辦說明會，向超過250名餐飲、酒店及旅遊業界代表介紹資料計劃，並簡介接待穆斯林旅客線上培訓素材。

已獲得清真認證嘅餐飲業界喺會上分享經驗心得。其中港式粉麵餐廳「十三姨」嘅創辦人林惠惠話，申請認證有助餐廳拓闊客源，獲頒認證後帶動餐廳生意增長4％至5%。佢話，初時都擔心餐廳可唔可以同時提供清真同非清真菜式，但之後發現，只需要規劃好工作流程，確保食材同用具分開烹調及存放，就能夠符合要求。

文體旅局長羅淑佩致辭話，期望資助計劃可鼓勵更多業界參與清真認證，鞏固香港喺國際穆斯林旅遊市場嘅競爭優勢。旅發局主席林建岳就話會繼續同相關業界緊密合作，進一步提升香港接待穆斯林旅客嘅水平。