Connect with us

港聞

【Emily】日本秋祭融創科 唔止文化美食

發佈於

【明報專訊】「日本秋祭in香港」今年踏入第十年,除咗繼續推廣日本文化同美食,今年首次加入創科元素。日本駐港總領事三浦潤同Emily講,月底將籌辦一場研討會,由日本同香港兩地初創企業家交流,仲有日本學者出席,佢話希望秋祭活動有新有舊,仲有藝術文化以外嘅元素,「總有一樣適合每個人」(There’s something for everyone)。

下月馬場有歌舞 花墟有美食

今年秋祭有超過100場活動,其中下個月同馬會合辦「日本節」,跑馬地馬場將有日本歌舞表演及飲食。日本料理店協會11月15號及16號會喺九龍花墟公園舉辦美食攤位,仲有傳統盆踊舞等歌舞表演。另外,《國寶》導演李相日10月底來港參與香港亞洲電影節放映。

日本執政聯盟正醞釀推選新任首相,三浦潤話唔適宜評論日本嘅政治發展,但就話香港同日本關係穩定堅實,唔會受外在因素影響,個人都強烈希望兩地關係得以繼續同增長。佢話嚟咗香港近一年,真切感受到港人對日本、其文化及食品等嘅熱愛,佢亦會鼓勵日本旅客同商界來港親身體驗。