經濟
匯豐大館展覽擺放4米高獅子像
【明報專訊】話說噚日匯豐宣布，為咗慶祝成立160周年，所以就喺中環大館搞咗個叫「匯豐盛演160年故事展：細說豐年 匯聚未來」嘅展覽，個展覽將會喺下星期五（17號）至11月7號期間舉行。匯豐話，呢次展覽將透過一系列嘅互動體驗，畀觀眾好似親歷其境咁，見證匯豐160年以嚟嘅傳承同埋願景。
匯豐提到，今次展覽嘅壓軸亮點就係「匯影未來」展區，入面有一座4米高嘅獅子雕像「巍然矗立」咁擺喺展區中間，而個設計靈感係嚟自家傳戶曉嘅匯豐銅獅「史提芬（Stephen）」同埋「施迪（Stitt）」，即係大家成日喺匯豐中環總行門口見到嗰兩隻。
匯豐呢次嘅展覽係免費入場，但公眾需要預先喺網上預約，而登記已經開始咗喇，如果有興趣見下Stephen同埋Stitt，就記得要預約咗先好去，廢事「摸門釘」。
