【Emily】葉文娟潘廸生做親家 特首到賀 李：夫婦傾偈 幾時發言女方話事

【明報專訊】政府高層日前有喜事，Emily聞說，特首辦主任葉文娟（Carol）上周五嫁女，其女兒Sammi同廸生創建主席潘廸生個仔Pearson結婚，特首李家超都有出席婚禮酒會，並上台分享夫妻相處之道。李家超講笑咁話，夫妻之間講啲咩話題可以交畀老公Pearson決定，但幾時行使發言權一定係Sammi話事，「包括暫緩、擱置，同終止」。李家超嘅生動發言，引來台上台下歡笑聲。

講番一對新人，Sammi係律師，曾喺國際律師行做，之後轉去爸爸間律師行做；新郎哥、廸生創建首席營運官潘冠達（Pearson）就做過高盛投行部，2016年返迪生創建幫手。兩人都係英國大學畢業。

因為Carol同老公李國忠都係中大校友，李國忠係理學院學生，1986年獲榮譽理學士學位，畢業後繼續攻讀法律，其後成為律師行合伙人，佢係聯合書院校董會副主席，去年獲母校頒授榮譽院士，所以佢嫁女都有唔少中大校友到賀。