【Emily】工會抗議九巴借風延遲傾加薪 公司：提今朝開會被拒

【明報專訊】超強颱風「樺加沙」逼近香港，九巴同龍運話因為要全力部署可能嘅極端情况，決定延遲同工會代表就今年薪酬檢討方案嘅會面，汽車交通運輸業總工會九巴同龍運巴士分會反對不果，噚日下晝喺九龍灣巴士車廠提交請願信，要求九巴同龍運唔好再拖延加薪。

汽總第二副主席兼九巴分會主任黎兆聰話，自今年6月已經開始同公司傾加薪，原定噚日再開會，但公司就以打風為由取消，即使工會強烈反對亦改變唔到，呢次行動係想同大眾講工會忍無可忍，要求公司唔好再拖延加薪。

九巴同龍運回覆話，明白員工對薪酬檢討嘅關注，計劃噚日完成颱風應變部署後，隨即繼續薪酬檢討相關工作，周末期間有同工會建議今朝舉行會議，不過汽總九巴同龍運巴士分會拒絕，目前正等緊進一步回覆，希望盡快落實下次開會日期。