【Emily】調查：傳理生追星者眾 利推流行文化 近半哈韓兩成愛港 45%一年花少過5000

【明報專訊】學生時代，邊個未追過星呢？恒生大學傳播學院透過網上問卷訪問7間傳理學院學生，發放近1000份問卷，當中400人話有追星經驗。追星者中近半46%話追韓星，其次大約兩成鍾意香港明星，日本、內地、泰國分別12%、9%同6%。受訪學生中，約45%每年使少過5000元追星，總計八成以上受訪者每年追星花2.5萬元以下，一成四就每年使超過3萬元。

六成參加應援活動

調查喺3至5月進行，88%同78%有追星經驗嘅受訪者話，追星同明星才華及外表有好大關係，46%就認同明星價值觀。佢哋94%會透過社交媒體追看偶像日常活動，63%會參加應援活動，58%參加演唱會、代言或生日會之類活動。

耗費時間方面，44%受訪者每年花8個禮拜以上追星，11%就花6至8個禮拜，少過兩個禮拜則有20%。

學院話，調查顯示未來傳媒工作者對流行文化接受程度高，願意花金錢時間追星，同時新媒體係年輕人追求流行文化嘅主要工具同渠道，加上年輕人熟悉新媒體，相信只要具備適當傳播技巧訓練，有助佢哋推廣流行文化。