【Emily】被問莊梅岩事件 羅淑佩：讓事實說明

【明報專訊】著名劇作家莊梅岩早前控訴遭康文署等封殺，文體旅局長羅淑佩噚日出席《施政報告》相關措施記者會時，被問到政府點樣確保每個表演者受到公平對待，佢回應話康文署依然每年有逾3900場演出順利進行，「我哋可以讓事實說明一切」。

莊梅岩近月接連喺facebook發文批評演藝學院「自製紅線」，又點名演藝、藝發局、康文署同西九文化區唔會承認封殺佢。羅淑佩回應時講明唔會評論個別個案，但話實際上現時嘅演出繼續同正常，「我覺得大家無需要就着個別嘅一啲評論太擔心，我哋可以讓事實說明一切嘅」。原定11月喺西九戲曲中心大劇院重演、由莊梅岩編劇嘅舞台劇《我們最快樂》一度疑遭煞停。莊前日喺facebook發文話「經歷萬難之後」劇作再獲「綠燈」，會盡快重啟預售。