【Emily】律師會設「提升地位工作小組」 強烈建議行家爭取訟辯律師資格

【明報專訊】律師會會長湯文龍(Roden)上任後推動事務律師中嘅「訟辯律師」可獲資深大律師名銜，睇齊大律師。Roden日前喺律師會刊物《香港律師》透露，律師會就此成立咗「提升律師地位工作小組」，並「強烈建議」行家爭取訟辯律師資格。

目前逾萬個本地執業律師中，約100人係享有較高法院出庭發言權嘅訟辯律師；至於大律師就有約1700人。由於非業界未必明兩者分別，外界有時誤以為大律師「大」啲，令部分律師有啲介意。

Roden喺文中話，律師會致力提高各界對律師喺司法機構任職同獲資深大律師資格嘅認識，並形容呢項改革至關重要。佢提到，訟辯律師可享較高級法院出庭權後，令訟辯律師同大律師角色界線日趨模糊，「為公平起見，任何給予大律師的認可，理應同樣適用於訟辯律師」。Roden又話律師同大律師可攜手合作，強化香港法制。

會長近日應邀率團訪山東

另外，佢近日應山東省港澳辦邀請率團到訪山東，先後拜訪山東省律師協會、山東政法學院等。律師會話，一行人喺山東省港澳辦安排下，攀登五岳之首泰山，體會到泰山所象徵嘅堅韌穩固，就聯想到法治建設所需嘅穩健基石。