【Emily】一齊做大專辯論賽評判 江玉歡：喺卿姐前輩度學到好多嘢

【明報專訊】民主黨前主席劉慧卿噚日發布咗一張同立法會議員江玉歡嘅合照，原來佢哋一齊為大專辯論賽做評判。江玉歡同Emily話，為辯論賽擔任評判時不時都會同卿姐碰頭，形容卿姐係前輩，「喺佢哋身上，我哋都學到好多嘢」。佢又話，參賽學生都好尊重卿姐，卿姐都有鼓勵佢哋多啲表達自己，做好本分。

合照好平常 「社會可有多元聲音」

曾經係民主派最大黨嘅民主黨正面臨解散，適逢立法會年底換屆，被問到會否避忌同民主派人物來往，江玉歡就話，大家一齊做評判，影張相係好平常嘅事，亦可以畀學生睇見「社會係可以有多元嘅聲音」。

大專辯論賽噚日舉行決賽，由嶺南大學對撼中文大學，辯論「本港學士學位普及化未能有效推動香港社會發展」，由中大隊勝出。江玉歡讚兩隊表現出色、實力相當；又提及現場唔少學生企足兩個鐘支持參賽者，「呢種team spirit （團隊精神）超越咗辯論本身」。

劉慧卿：盼同學未來入議會代港人發聲

劉慧卿就喺活動上致辭，話大家喺辯論台上乜嘢都可以講，叫大家要堅持，同學將來仲有大把機會辯論，話「好希望我哋香港將來真係有民主，我哋同學可以參加真正嘅選舉，入到議會，代表香港人發聲」。劉慧卿發言後，台上台下一片掌聲。