【Emily】蔡俊彥再獻唱 羅淑佩舉手機燈

【明報專訊】早前喺MIRROR成員呂爵安演唱會上獻唱嘅港隊男子花劍代表蔡俊彥（Ryan）噚日再度開金口，喺十五運會和殘特奧會香港賽區義工誓師典禮上唱出歌手陳蕾嘅《凡星》，Emily同觀眾都喺現場聽出耳油，連好支持本地歌手嘅文體旅局長羅淑佩亦為佢舉起手機燈𠻹。

第15屆全運會就快開鑼，香港賽區將承辦擊劍等項目。Ryan噚日同Emily講，今屆以團體賽金牌為目標，個人賽則「每日都唔同，今日想攞金牌，有時嗰日比較疲累，目標8強先」。佢又話，今年喺好多比賽奪獎時，都想立即同親友分享，好開心親友喺今屆全運會可到現場支持，希望用好成績報答大家。

講笑話比賽日「嗌吓對手名」

Ryan話，自己優勢在於靈活，但擁有相同優勢嘅內地劍擊運動員大有人在，所以會研究吓佢哋嘅打法針對部署，笑言比賽當日「可以唔使淨係嗌我個名，嗌吓其他對手嘅名，干擾佢哋，不過適可而止」。