【Emily】彩明街市借熱氣球過橋 「慰苦主」送雪糕雪條

【明報專訊】「友邦香港國際熱氣球節」嘅安排早前惹來大批消費者抨擊，主辦方最終全額退款。啱啱做完裝修嘅將軍澳彩明街市就話要「慰藉一眾苦主嘅心靈」，推出「熱氣球苦主」優惠，即日起至9月14日憑熱氣球節門票喺街市小食街消費，可以免費獲贈雪糕或雪條，喺部分商戶買指定產品都有優惠。

為期3日嘅優惠由每朝10點開始，雪糕或雪條限量供應。所有經官方渠道買熱氣球節門票嘅人都符合資格，每人每日限換一次。至於參與優惠嘅商店同產品就包括雞蛋仔、桃膠芋圓鮮奶、水果茶、越式小食等。

爆紅投訴人獲邀「探路」

其中一名事主何小姐（圖）因為接受訪問嘅片段紅遍網絡，獲邀到彩明街市「探路」。佢話自己有翻天覆地嘅變化，有街坊認出佢之餘仲想合照。講到成功獲退款，何小姐覺得開心，但最感動係獲得好多港人支持，話事件係對小朋友嘅正面教材，「就算面對不公嘅事都要勇敢發聲！」