【明報專訊】全運會將喺11月9日開鑼。文體旅局長羅淑佩噚日喺社交媒體出帖問「打風要食杯麵？？？」並上載一眾女局長拎住「杯麵」嘅相，但呢件其實係寫上「主場出擊」字句、杯麵外形設計嘅盲盒掛飾。睇番資料，呢套盲盒一套4款，內有專為香港賽區承辦嘅全運會項目而設計嘅公仔，有籃球、高爾夫球、沙灘排球同七人制橄欖球，仲有兩款隱藏版劍擊同場地自行車掛飾。除咗羅淑佩，一齊抽盲盒嘅高官有房屋局長何永賢、公務員事務局長楊何蓓茵、民青局長麥美娟、發展局長甯漢豪、運物局長陳美寶、教育局長蔡若蓮同特首辦主任葉文娟。佢哋各自拎住掛飾，為主場出擊香港運動員打氣。
