【Emily】清水冲涼 林超英：太太無再話我腳臭 稱醫生建議 以免番梘或致敏

【明報專訊】為咗環保，大家都知道天文台前台長林超英喺炎夏唔開冷氣，只開風扇；林超英冲涼亦只用清水，唔用番梘或梘液，不過佢話其實係皮膚科醫生叫佢咁做，同環保未必有關。佢仲話以前用番梘冲涼，佢太太偶然會話佢腳臭，唔用之後太太無再話佢腳臭。

稱山竹吹襲無死人 港備災冠全球

林超英接受一間深度遊公司網上訪問時解釋，係皮膚科醫生同佢講，冲涼用番梘或梘液有可能令皮膚敏感，佢又話人類嘅皮膚上面有微生物群對付空氣中嘅細菌同病毒，人類過去二三百萬年用清水冲涼都無事，即係無問題。

極端天氣愈來愈常見，被問到港人應該如何應對，林超英話過去政府投放唔少資源喺渠務同山坡治理，仲有由佢「發明」嘅暴雨警告系統，令香港硬件及軟件俱備，當天災發生時，市民遠離災難，即使2018年超強颱風「山竹」襲港，香港亦無死亡報告，所以佢話全球都唔會有一個地方喺備災工作上可以贏到香港，而紅黃黑雨呢個制度，更加係香港推出後，內地同歐盟都學咗，所以佢話呢個制度係世界第一，香港人唔使諗咁多，留喺香港係最好嘅。

對於天文台掛風球決定有無考慮經濟影響等因素，佢就認為天文台以科學為基礎，以服務為目的，從來都無受其他政府部門或高官影響。