【Emily】公僕抗戰賽 考舌尖後不送氣清塞擦音

【明報專訊】今年抗戰勝利80周年，公務員事務局7月就開始舉辦相關紀念活動，近日舉行「鐵血河山」普通話問答比賽，現職公務員同政府合約僱員都可以參加。Emily攞到份比賽題目，有啲題目需要參加者同時掌握抗戰歷史同普通話，例如根據一連串用拼音寫嘅事迹、身分等提示，估出對應嘅歷史人物。

比賽試題一共有25題，大部分係選擇題，有較基本嘅選擇正確拼音同聲調、辨識輕聲字同多音字、揀正確量詞等，但有啲題目就深入啲，例如要選出形容黃河怒吼聲響嘅擬聲詞、選出聲母係「舌尖後不送氣清塞擦音+唇齒擦音」嘅詞語。

得獎名額一共150個，頭50名得獎者可獲200元書券，51至100名有100元，其他有50元，而所有參加者可獲紀念品一份。

公務員事務局長楊何蓓茵7月喺facebook預告比賽，當時佢話比賽有雙重意義，一係響應每年「全國推廣普通話宣傳周」，提高公務員學習普通話興趣，二係讓公務員透過史實感受愛國情懷，加強國民身分認同。