【Emily】男拔附小面試前 校長籲畀仔女玩吓

【明報專訊】直資名校拔萃男書院附屬小學上周六舉行入學簡介會，家長坐滿禮堂，男拔校長鄭基恩一開場連環發放「笑彈」，佢喺簡報展示圖片，上寫有唔同心情嘅英文字，見家長舉機影屏幕立即「澄清」，「家長你哋未必需要影㗎，面試嗰陣，唔會問你個仔啲字咩意思㗎」，惹來全場大笑。

幅圖有Joyful（快樂）、Down（情緒低落）等英文字，鄭校長問家長邊個字代表到心情，請家長諗諗暑假儲到幾多能量。佢又話，男拔附小校長何建儀亦喺開學會議拎張圖同教師傾偈，想大家了解心境，幫助處理問題。

鄭校長見有舊生都返嚟聽講座，並出題考問拔萃校訓係乜，未有人回答佢已經打圓場，「其實冇校訓㗎」，全場又大笑。佢解釋男拔一直以信仰為基礎，培育出類拔萃、品德優良嘅人，又提醒好多小學家長「好擔心落後隔籬嗰家人」，於是安排好多補習，呼籲畀多啲空間學生思考、沉澱、發掘興趣。

上任一周年嘅男拔附小校長何建儀鼓勵家長容許學生「留白」，舉例面試前去遊樂場鬆一鬆。有家長就問小朋友係「I人（內向型）」影唔影響入讀機會，何校長話會招收唔同類嘅學生。