【Emily】工聯調查：六成打工仔 打風黑雨要返工

【明報專訊】近月出現多場暴雨，工聯職安健協會調查發現，超過六成受訪僱員喺8號或以上風球、黑雨警告或者極端情况生效期間仍要返工，當中約一半人唔知有關信號生效期間返工、放工4小時內都受《僱員補償條例》保障。

協會喺7至8月訪問621名工友，了解佢哋喺惡劣天氣下工作嘅安全保障。調查發現，52%受訪者話僱主無提供惡劣天氣期間返工放工嘅交通安排，28.6%受訪者嘅公司無為員工提供特別津貼。

盼釐清當值「指定人員」定義

工聯職安健協會希望，《惡劣天氣及「極端情况」下工作守則》對於必須當值嘅「指定人員」定義可以更清晰，避免非必要嘅人員要喺惡劣天氣下返工，亦認為僱主有責任考慮僱員返工途中嘅風險，建議提供交通工具、交通津貼，視乎僱員所在地區情况再調配人手等。