【Emily】嘉許優秀文化大使 李業廣現身

【明報專訊】賽馬會「何以中華」文化大使計劃噚日搞嘉許禮，表揚獲選為「優秀文化大使」嘅中學生。文體旅局長羅淑佩出席時話，香港文化兼容並蓄，喺一國兩制優勢下要以多元形式向世界展示中華傳統文化瑰寶，藉創新表達方法講述中國故事，促進民心相通。

Emily喺嘉許禮上，見到年近九旬嘅港交所前主席、現任中國文化研究院理事會榮譽主席李業廣，團結香港基金主席陳智思、馬會董事黃嘉純等亦有出席。

「何以中華」文化大使計劃2024年推出，由馬會贊助、團結香港基金主辦，共培訓179名中學生為「優秀文化大使」，積極喺社區推廣中華文化，噚日舉行嘉許禮，由羅淑佩表揚一眾「優秀文化大使」喺推廣中華文化嘅努力同傑出表現。

羅淑佩致辭時，寄語完成培訓計劃嘅同學要回饋社會、傳揚中國文化，多同朋友分享，除咗自己參與中華文化活動，都要邀請朋友一齊參加。佢話政府一直致力向青少年推廣中華文化，並期望通過宣傳、教育，增強市民嘅文化自信同愛國情懷，加深國民身分認同。