【Emily】毛孩可住 深水埗青年宿舍收表

【明報專訊】深水埗青年宿舍「東華．南昌匯」項目正接受申請，18至30歲在職香港永久居民，只要無持有本港住宅物業兼符合人均月入唔超過2.92萬元、資產唔超過約40.4萬元等條件，經審批及面試後就有機會入住。呢間青年宿舍仲有寵物友善單位，租戶可帶同「毛孩」共住。

9．30前入伙免租一月

「東華．南昌匯」由東華三院同香港小輪（集團）有限公司推出，係政府「青年宿舍計劃」下「將酒店和旅館轉作青年宿舍用途的資助計劃」第六個項目，有兩座大樓，提供共676個宿位，設有開放式、一房同兩房戶型，面積261至412平方呎，適合1至4人入住，全部單位設獨立洗手間同露台。每人每月住宿費4310元起，而下月30日前成功申請同入住，可獲1個月租金豁免嘅早鳥優惠。

青年宿舍亦有各項會所設備，包括健身室、燒烤場及band房，亦有東華三院專責團隊度身訂做嘅活動同培訓，提升租戶嘅技能、社交或其他社區參與，鼓勵青年租戶喺共享空間同其他租戶互動，期望提高佢哋社區參與度，建立互助互信嘅社交網絡。