【Emily】「一線牽」27年 搖搖大叔登世一

【明報專訊】香港再有運動員登「世一」！講緊嘅係搖搖運動員黃偉鑠（阿反），日前喺捷克布拉格嘅世界搖搖大賽擊敗日本同意大利等地嘅7個高手，奪得「40歲以上自由花式」冠軍。據官方賽果，阿反憑單手線上自由花式奪得總分88.8分，拋離亞軍逾20分。香港花式搖搖協會主席Danny希望，阿反嘅好成績令大眾關注搖搖運動。

空轉世界紀錄13年未被破

27年前開始接觸呢項運動嘅阿反非常熱愛搖搖，早喺2009年同朋友成立自家品牌，度身訂做自家製搖搖，仲喺2012年世界搖搖大賽嘅「勁力旋風Long Sleeper」組別創下30分鐘28秒嘅搖搖空轉世界紀錄同奪標，紀錄至今未被打破。

Danny話，今年港隊派咗7人應戰，阿反同隊友張志榮出戰「40歲以上自由花式」組別，分別奪冠及季軍。佢話大賽每年輪流喺捷克、日本同美國舉行。根據賽事網站，40歲以上自由花式組別選手每人有兩分鐘、須喺1A至5A等級中揀一項作賽，包括單手線上自由花式、離手自由花式等。大賽早喺1932年舉行，1992至2013年賽事都係由一位搖搖愛好者舉辦，直到2014年起轉交國際搖搖球總會。