【Emily】睇工權會《餘生》 劉千石思考餘生

【明報專訊】工權會最近出版新書《餘生》，記錄9個工殤家屬嘅故事。工權會主席劉千石同Emily講，新書觸發佢思考「咁我餘生做咩？」佢決定聚焦兩件事，包括繼續投身工權會事務，希望下一代唔使再面對工業安全問題，亦會推動兒童粵劇發展。

蕭倩文：有法律生自薦實習

近年甚少公開露面嘅石哥，早前同工權會總幹事蕭倩文與傳媒茶敘。石哥話，《餘生》書中每個工殤家屬都有希望繼續做嘅事，令佢自問餘生應該做咩。石哥自1981年工權會成立已積極提倡工業安全，佢話唔想下一代仍要面對呢個問題，所以會繼續參與工權會工作。

對於當下社會環境下工權會工作有無困難，石哥話幾時都難做，寄語後輩要有承擔，最緊要用心工作，「困難總可以克服到」。蕭倩文就話，近年社會多咗關注工權會，唔少年輕人加入實習，除咗社工系學生，更有法律系學生自薦。

工權會最近年度籌款，推出《餘生》嘅慈善義賣套裝，蕭倩文話目標籌得200萬元。佢提到，最近有建築公司接洽想購入大批《餘生》，送畀員工閱讀，佢希望可以藉此警惕工友注意工業安全，鼓勵其他公司仿效。蕭倩文又透露，工權會考慮緊再出版新書，主要講述工殤相關嘅生死教育。