【Emily】上京閱兵團 議員獲邀準則睇唔透 有說請委會正副主席 但非人人有份

【明報專訊】今年係抗戰勝利80周年，北京天安門9月3日將會舉行閱兵儀式，據Emily了解，一眾港區人大、政協、行政會議成員都收到邀請，屆時上京參與儀式，而部分立法會議員自上星期起都陸續收到政制及內地事務局來電，邀請佢哋齊齊上京，之不過，邊啲人收到邀請，邊啲人無，多名議會中人都話摸唔清標準，大家都好奇。

近日政圈先後傳出不同消息，有說受邀對象係政黨高層，又有說係事務委員會嘅正副主席，不過Emily向多名事務委員會正副主席了解，又唔係全部都獲邀。確實準則係點，唔少議員都話摸不着頭腦。

撞正假後首大會 「趕車」仍可能取消

最終有幾多立法會議員獲邀上京仍係未知數，但閱兵當日撞正立法會暑假後首次大會，據悉當日取消會議嘅成數極高。有獲邀嘅資深議員話，按以往慣例，官方活動多數會邀請立法會主席，而現時嘅代主席、即內務委員會主席李慧琼係人大常委，副主席陳健波係行會成員，相信都喺受邀名單之中，因此開得成會嘅機會好低。

唔少具分量嘅政府法案正排隊審議，包括有關網約車規管、簡樸房規管、控煙條例、同性登記制度等，而由於年底舉行立法會換屆選舉，今屆會期將提早喺10月22日結束，其間安排咗7次大會，但考慮到換屆選舉提名期可能10月中展開，加上《施政報告》預料9月中發表，若果9月3日嘅會議取消，可以審議政府法案嘅會期就更少，有議員預計「趕車」之下，無約束力嘅議員議案極可能要犧牲。