【Emily】熊貓孖B牛一開P 有請20個同日生嘅BB

【明報專訊】一對大熊貓龍鳳胎「加加」同「得得」嚟緊8月15日就滿一歲，為咗幫兩姊弟慶生，海洋公園、文體旅局同旅發局合辦一系列活動，包括喺生日當日邀請20個與龍鳳胎同年同月同日、喺香港出生嘅一歲小朋友，以及「家姐細佬後援會」會員等一齊參加特別派對。

海洋公園話，有意參加特別派對嘅「小壽星家庭」家長，即日起至8月4日可到海洋公園官方facebook及Instagram專頁嘅指定帖文留言報名，留言最有心思同創意嘅就可以一齊開生日會。

路牌添姊弟照 Labubu推特別版

大熊貓姊弟仲有一系列生日主題零售商品推出。有「Labubu之父」之稱嘅本地藝術家龍家昇設計咗特別版Labubu，以翠綠竹葉顏色做主色，手抱兩隻熊貓BB，仲戴住頂派對帽。8月1日至30日去海洋公園並預先登記嘅旅客，就有機會抽獎獲得內附特別版Labubu同生日賀卡嘅禮盒。

文體旅局同旅發局7月底開始亦喺全港32條街換上大熊貓主題路牌，加入融合龍鳳胎成長照、地道美食等嘅設計，例如西營盤第一街嘅路牌上面，會有戴住生日帽嘅加加得得同生日蛋糕。