喺香港出世嘅荷李活楝篤笑及喜劇演員歐陽萬成（Jimmy O. Yang）早前喺紅館連開5場騷。Jimmy嘅經理人公司今日（12日）喺微博發文，話Jimmy近日同特首李家超喺政府總部見面。李家超讚Jimmy喺香港開騷吸引各地觀眾，展現香港文化包容同活力。
李家超仲提到特區政府近年興建新表演場地，同時提升現有場地設施，相信可以吸引到更多好似Jimmy嘅知名藝人來香港演出，推動優質演藝活動。
Jimmy同李家超原來都係「華仁仔」，Jimmy係香港華仁書院舊生，而李家超係九龍華仁書院校友。今次見面仲有「一帶一路」專員何力治，佢同Jimmy仲係舊同學添，三個人都有傾到校園往事同趣聞。
