【Emily】港鐵賣退役Ktt車 鐵路迷倡做地標

【明報專訊】港鐵紅磡站「站見」鐵路展1月起展出退役多年嘅九鐵列車「Ktt」，過咗半年，有鐵路迷發現港鐵近日喺網站發表資格預審公告，透露將招標處理或者出售Ktt列車。

根據公告，港鐵會招標處理或者出售全部Ktt車卡，即係兩節機車同12節客車，方案包括整架轉售或者拆解當廢料賣，有意者最遲月底交意向書，預計第三季招標。

唔少鐵路迷大嘆可惜，希望可保留部分車卡。關注鐵路發展嘅facebook專頁「火車未到站」噚日出帖，話寫咗信畀運物局同港鐵表達意見，又建議政府考慮喺紅磡站周邊發展用地擺放退役交通工具做地標。佢哋引述局方回覆話，港鐵一直有既定程序處理退役列車，亦提到港鐵早前應邀就紅磡站周邊用地發展制定初步建議，局方已將意見轉達畀相關部門同港鐵考慮；港鐵就話今次資格預審係服務採購嘅一貫程序。