【Emily】立會會議直播月內推實時字幕

【明報專訊】立法會與科大訊飛前年合作推出智慧謄錄系統「智識聽」，今個月內會為立法會全部會議直播提供實時字幕，開支約900萬元。立法會噚日向傳媒示範新功能，Emily見到字幕大致準確，個別字句有錯，如「欣澳站」變「殷路站」、「洪港鐵路」變「洪廣鐵路」，立法會主席梁君彥承認系統唔熟地名，將加強訓練。

開支900萬

「智識聽」未熟地名

立法會現時已使用「智識聽」即時謄錄會議內容，協助撰寫會議紀錄，並將於今個月內利用系統為立法會、各事務委員會同法案委員會會議提供實時字幕。立法會噚日舉行簡介會，畀議員、官員與傳媒率先睇吓新功能。梁君彥話「智識聽」準確度約96%，配合秘書處職員即時校對字句，字幕準確度可達99%。佢話由於職員需時修正字句，提供字幕嘅畫面會延時約19秒，日後希望縮短到15秒。對於字幕部分字句經修正後仍然出錯，梁君彥承認系統未必掌握地理名稱，後台職員亦唔熟悉，之後會加強訓練系統，尤其北部都會區嘅地名。

「智識聽」至今所用開支約2200萬元，當中包括其中第三期升級硬件並推出實時字幕用嘅900萬元。梁君彥形容「係超值嘅」，希望繼續完善系統，包括同時實時提供英文字幕。