【Emily】的士司機筆試 地方路線試題擬大減

【明報專訊】政府將會向5支「的士車隊」發牌，不過外界有聲音話好難請司機。運輸及物流局長陳美寶噚日書面回覆立法會議員時提到，運輸署會進一步全面檢討的士司機嘅考核安排，包括會更新試題庫，大幅減少同簡化的士筆試乙部有關地方同路線嘅試題；當局解釋，係因為考慮到𠵱家嘅導航科技，已經可以幫的士司機好快咁搵到目的地同規劃最佳行駛路線，希望可以令考核更切合實務需要。

陳美寶亦提到，運輸署喺2020年2月更新的士筆試嘅考核內容及調整試題數目，吸引到更多人報考的士筆試，應考人數由2019年嘅唔夠1萬增至上年接近1.4萬，大升四成；的士筆試及格率亦提高咗，2019年得37%，上年有60%，反映更新筆試可以吸引到新人投身的士司機行業。