【Emily】歐盟：支持北都綠色發展

【明報專訊】歐盟目前係香港最大外來投資來源地，除商貿往來，兩地官員噚日話，喺應對氣候變化同綠色發展可多啲合作。歐盟駐港澳辦事處主任盧效偉喺佢哋同香港歐洲商務協會合辦嘅「綠色之道」論壇話，可持續性係歐盟同港府以及香港持份者合作同互動嘅核心。佢形容歐盟係香港重要伙伴，並期待支持香港北部都會區綠色發展。

連續第二年去論壇嘅特首李家超就話，會平衡發展與可持續性，並與包括歐盟在內嘅唔同地方合作，又話期待歐盟企業參與北部都會區發展。

今年由環境及生態局長謝展寰代表港府，接收由歐洲商界同本地專家制訂綠色轉型嘅23點政策建議，包括公共採購同招標中納入更多可持續發展要求、研究增加披露建築物用電量，將可持續發展原則納入貿易框架等。謝展寰噚日行色匆匆，出席主題演講同接收政策建議後先行離開，無回應記者提問。