【Emily】警換通訊系統 議員以為仲有「勾線」

【明報專訊】保安局建議興建警隊新一代「通訊系統的基礎設施」，以5G網絡取代數碼集群無線電技術（TETRA）系統，噚日獲財委會通過撥款。航運交通界議員易志明話，「以往聽到現有系統，好多時人哋勾到你啲線，聽到事發現場（資訊），傳媒仲早過警員到場」，關注新一代系統會唔會有相同問題。

保安局副局長卓孝業回應話，能夠透過無線電聽到報案嘅係第一代模擬制式年代，其後2004年轉換系統，當時有好多新聞從業員投訴無法收到相關資訊，所以警察公共關係科每有突發事件，會協助發布資訊。卓話現行TETRA系統有加密功能，新系統則設兩重保密算法。

局方兩年前預計項目嘅撥款申請約52億元，今次減至約20億元，減幅逾六成。實政圓桌議員田北辰形容「好到難以置信」，未試過撥款咁開心，希望將來成為所有部門跟從嘅「典範」。